🌐 🌿 Ҡурай Күп быуаттар буйы ҡурай – халҡыбыҙҙың мәҙәниәте лә, тарихы ла, яҙмышы ла. Ҡурайсылар элек-электән ҙур абруй менән файҙаланған. Улар быуындан быуынға үҙҙәренең оҫталығын, тәжрибәһен тапшырып, беҙгә боронғо халыҡ йырҙарын, оҙон көйҙәрҙе килтереп еткергән... Ҡурай – ысын мәғәнәһендә башҡорт өсөн тыуған ер, тәбиғәт бүләге, Урал тауҙарын йәнтөйәк иткән ата-бабаларыбыҙҙың рухи мираҫы. Ҡурай үләненең тик ошо ерҙе генә үҙ итеүе – үҙе бер мөғжизә. Ә көҙгө һалҡындарҙан һулыған үләндәр араһында ҡояштай сатыры менән ғорур баҫып торған һабаҡ үҙе – мәңгелек символы. Шул ҡыу ҡабаҡты ҡырҡып алып, көпшәһе аша тын өрөп, тәбиғәттең үҙе кеүек мәңгелек моң яралтыу – икенсе мөғжизә. Өсөнсө мөғжизә – сал тарихыбыҙ дауамында бер ниндәй ҙә ваҡыт һәм ара һынауҙарының башҡортомдан айыра алмауы. Был тәбиғи үҫемлектең тажында саталары күпме булһа, шунса асылмаған серҙәрен, мөмкинселектәрен һаҡлай ҡурайыбыҙ.